വൃത്തവും പ്രാസവും

ഇടയില്‍ തലപൊന്തുന്ന
വിമര്‍ശന ബുദ്ധിയായ
വായനക്കാരാ
താങ്കള്‍ തേടുന്നത്
എന്താണ് ?
വൃത്തവും പ്രാസവുമോ ?
ജീവിതത്തിന്‍റെ വൃത്തവും
പ്രാസവും തെറ്റുമ്പോഴാണ്
സുഹൃത്തേ ,
ഈ ഉള്ളവന്‍ കവിത
എഴുതി പോകുന്നത്

കിളി

ആകാശം സ്വപ്നംകാണുന്ന കിളി
മരച്ചില്ലയില്‍ കൂടുക്കൂട്ടിയുറങ്ങുന്നു
അതിന് കൂട്ട്, ഭൂമിയിലെ കാറ്റും
മണ്ണിലെ വിത്തും.
കൂടുപേക്ഷിച്ചു
വിത്ത് കൊത്തിയെടുത്തു
കാറ്റില്‍ പറന്നുയരുന്ന കിളി,
നക്ഷത്രങ്ങളെ കൊത്തിതിന്നു
മേഘങ്ങളില്‍ കൂടുകൂട്ടാമെന്നു
വ്യാമോഹിക്കുന്നു.

നക്ഷത്രങ്ങളെ കാണാതെ
മേഘങ്ങളില്‍ മുട്ടാതെ
ചിറകു കുഴഞ്ഞു
അവസാനം -
മരച്ചില്ലയിലെ കൂട്ടില്‍
കാറ്റില്‍ ക്ഷീണമകറ്റി
മണ്ണില്‍ വിത്ത് കാഷ്ടിക്കുന്നു

അപരന്‍

ചാനലുകള്‍ ചവച്ചുതുപ്പിയ
'നേതാവ്' ഉച്ച്ചിഷ്ടമായപ്പോള്‍
പേരില്‍ മാറ്റമില്ലാത്ത,
ചാലനുകളില്‍ കാണാത്ത
പുത്തനായവനിട്ടൊന്നു കുത്തി
പിറ്റേന്ന് പത്രം പറഞ്ഞു
'അപരന്‍' നേതാവിന്റെ
പതിനായിരം മാറ്റിയെന്നു
പിന്നേ.......
പൊട്ടന്മാരല്ലേ
വോട്ടുചെയ്യാന്‍ പോകുന്നത്

ചാലിയാര്‍ തോണി അപകടത്തില്‍ ന്യൂട്ടന്റെ പങ്ക്

മുങ്ങുന്നതിനു മുന്‍പ്
നമ്മള്‍ സംസാരിച്ചത്
ഫിസിക്സിലെ ചലന
തത്വത്തെക്കുറിച്ചായിരുന്നു
ഒന്നും, രണ്ടും തത്വങ്ങള്‍
നാമിരുവരും വള്ളത്തില്‍
അനുഭവിച്ചറിഞ്ഞു
നിന്റെ കരങ്ങള്‍ എന്നെ
ജീവനിലേക്കു നടത്തിയപ്പോള്‍
മൂന്നാമത്തെ തത്വം ഞാന്‍
മാത്രമറിഞ്ഞു
To every action there is
an equal and opposite reaction

മിസ്സ്‌ഡ്‌ കോള്‍ കാലത്തെ പ്രണയം

1.
ഇണകിളികള്‍ ഇപ്പോഴും
കൂടുകൂട്ടാറുണ്ട്
ട്രെയിനില്‍
ബസ്സില്‍
പാര്‍ക്കില്‍
ആളൊഴിഞ്ഞ മൂലയില്‍ .......

അടുത്ത ഒരു
മിസ്സ്‌ഡ്‌ കോളില്‍
ഒരുപക്ഷേ
കൂടൊഴിയുകയും
അടുത്ത കൂട്
കൂട്ടുകയും ചെയ്യും !!


2.
ആദ്യ മിസ്സ്‌ഡ്‌ കോള്‍
വന്നപ്പോള്‍
സോറി, റോംഗ് നമ്പര്‍
പിന്നെ -
ശല്യം
നാശം
പിന്നെ പിന്നെ -
പൊന്നേ
ചക്കരേ
പിന്നെ പിന്നെ പിന്നെ -
വയറിനുള്ളില്‍
ഒരു റോംഗ് നമ്പര്‍ !!

വര്‍ഗ്ഗസമരം

വര്‍ഗ്ഗസമരത്തിനു
ഇറങ്ങിപുറപ്പെട്ടപ്പോള്‍
മറ്റൊന്നും ചിന്തിച്ചില്ലായിരുന്നു
ഭാര്യ, കുടുംബം, മക്കള്‍, സ്വത്ത്‌ .......

ഇന്നു എല്ലാം ചിന്തിച്ചു
തുടങ്ങിയപ്പോള്‍
ഒന്നു മാത്രം മറന്നു
ഏതു വര്‍ഗ്ഗം ?

പ്രണയാധ്യായങ്ങള്‍

1. പ്രണയം
സത്യമെന്നു നിനയ്ക്കുമ്പോഴും
സത്യമല്ലാത്തത്
പൂര്‍ണമെന്നു പറയുമ്പോഴും
അപൂര്‍ണമാകുന്നത്
എന്റെ മാത്രം എന്ന് പറയുമ്പോള്‍
അങ്ങനെയും അല്ലാത്തത്

2. പ്രണയിനി
മധുരം കലക്കിയ
പാത്രത്തില്‍ അല്പം
വിഷവും ചേര്‍ത്ത്
സദാനേരവും
ഊട്ടുന്നവള്‍

3. നഗ്നത
കാണിക്കാന്‍
മടിക്കുന്നതല്ല
എത്ര കാണിച്ചാലും
വെളിവാകാത്ത ഒന്ന്

4. രതി
രമിക്കുമ്പോള്‍
തീപാറുന്നത്
രസം തീരുമ്പോള്‍
തിരിഞ്ഞു കിടക്കുന്നത്

കവിയുടെ ശവമഞ്ചം

ഇത് ഒരു കവിയുടേ
ശവമഞ്ചം
ആരും ചുമക്കുവാനില്ലാതെ
ആരോ പെരുവഴിയില്‍
ഉപേക്ഷിച്ച ശവമഞ്ചം
അതിലിന്നലയുടെ
ദുസ്സഹ നാറ്റം

ഇത് ഒരു കവിയുടെ
ശവകച്ച
ആരോ വലിച്ചെറിഞ്ഞ
ഒരു തുണ്ട് തുണി
അതിലിവന്റെ ഹൃദയരക്തം
പൊടിഞ്ഞുണങ്ങിയിരിക്കുന്നു

ഇത് ഒരു കവിയുടെ
വിലാപയാത്ര
ആരുമില്ലാതെ
ആരുമറിയാതെ
ഏകാന്തനായി..........

ഇത് ഒരു കവിയുടെ
പ്രാര്‍ഥനാസൂക്തങ്ങള്‍
എല്ലാ പ്രണയവും
സത്യമെന്നു നിനക്കരുത്

പ്രേതവിചാരണ

അകത്തെ മുറിയില്‍
കീറിമുറിച്ച അവളുടെ
ശവം കിടക്കുന്നു

ഉന്തിയ കണ്ണില്‍
അവസാനം കണ്ട സ്വപ്നം
വാടികിടക്കുന്നു
അതു കാണാതെങ്ങനെയവരാ
കണ്ണുകളില്‍ ഉമ്മവെച്ചു

പൊട്ടിയ ചുണ്ടില്‍
പറയുവാന്‍ ബാക്കിവെച്ചതെന്തോ
മരവിച്ചു നില്‍ക്കുന്നു
അതു തടഞ്ഞെങ്ങനെയവരാ
ചുണ്ടുകള്‍ നുകര്‍ന്നു

കലങ്ങിയ മുലകളില്‍
ഒരു കുഞ്ഞിന്റെ വിശപ്പ്
തെളിഞ്ഞു നില്‍ക്കുന്നു
അതു തട്ടിതെറിപ്പിച്ച്
എങ്ങനെ അവരതൂറ്റി കുടിച്ചു

രക്തച്ചാല് പൂണ്ട ഉടലില്‍
ഒരു കാമുകന്റെ മോഹങ്ങള്‍
നീലച്ചു കിടക്കുന്നു
അതു ചവുട്ടിമെതിച്ച്
എങ്ങനെയവരത് പുണര്‍ന്നുല്ലസിച്ചു

ഉഴുതു മറിഞ്ഞ
ജനേന്ദ്രിയത്തില്‍
ഒരു ജീവന്റെ ജാലകം
അടഞ്ഞു കിടക്കുന്നു
അത് തള്ളിതുരന്നെങ്ങനെയവര്‍
മുഴുവന്‍ കവര്‍ന്നെടുത്തു

അകത്തെ മുറിയില്‍
കീറിമുറിച്ച അവളുടെ
ശവം കിടക്കുന്നു

അതില്‍
വാടിയ സ്വപ്നങ്ങളും
പാതി വാക്കും
കുഞ്ഞിന്റെ വിശപ്പും
കുറേ മോഹങ്ങളും
അനാഥമായി കിടക്കുന്നു

പ്രണയശിക്ഷ

നിന്നെ പ്രണയിച്ചതിനു
തന്ന ശിക്ഷ മരണമല്ലായിരുന്നു
ജീവിതമായിരുന്നു !!
അബോധത്തിലെ അലച്ചിലായിരുന്നു
വീര്‍പ്പുമുട്ടിക്കുന്ന
സൂട്ടും കോട്ടുമായിരുന്നു
പാതിമരിച്ച ചിരിയായിരുന്നു
വെളുത്ത പുറത്തിനും
കറുത്ത അകത്തിനും ഇടയില്‍
ഇനിയും പിറന്നിട്ടില്ലാത്ത
കവിതകളുടെ കനല്‍മൊഴികള്‍
തേടലായിരുന്നു

വാക്ക്

നീണ്ട
കലഹത്തിനോടുവില്‍
വാക്കും ശരീരവും
വഴി പിരിഞ്ഞു
ശരീരം വാക്കിനോട്
ഒരു നീതിയും
പുലര്‍ത്തിയിരുന്നില്ല

ശരീരം പിറന്നപ്പോള്‍
വിളിച്ചറിയിച്ചതും
വളര്‍ന്നപ്പോള്‍
വെളിച്ചമായതും
പ്രേമിച്ചപ്പോള്‍
മധുരമായതും
വാക്കായിരുന്നു
ഒടുവില്‍
ഇരുളിന്റെ മറവില്‍
ശരീരം വാക്കിനെ വഞ്ചിച്ചു

ആദ്യം
ഇരുളിലും
പിന്നെ
വെളിച്ചത്തും വാക്ക്
അവമതിക്കപെട്ടു

തെരുവുകളില്‍
വാക്കും ശരീരവും
ദ്വന്ദയുദ്ധത്തിലേര്‍പ്പെട്ടു
വാക്കിന്റെ പ്രാണനെ
പിഴുതെടുത്ത്
ചത്ത വാക്കുകള്‍
കാഴ്ച്ചകരുടെ മുഖത്തേക്ക്
വലിച്ചെറിഞ്ഞ ശരീരം
കൈയടിയും ജയ് വിളിയും നേടി

കോടതിയുടെ
മരവിച്ച മുറിക്കുള്ളില്‍
പലവുരു വാക്ക്
വ്യഭിച്ചരിക്കപെട്ടു
മാറ്റിയും മറിച്ചും
നീതിയുടെ തുലാസില്‍
ശരീരം ഉയര്ന്നു
തന്നെ നിന്നു

പത്രതാളുകള്‍
നാവ് മുളപ്പിച്ചു
വാക്കിനെ
പിച്ചി ചീന്തി
നിറങ്ങളുടെ
താളത്തിലും
കൊഴുപ്പിലും
ചാനലുകള്‍
അമ്മാനമാടി

മുറിഞ്ഞ വാക്കും
ചത്ത വാക്കും
ആക്രോശിക്കുന്നു
'ശരീരത്തിന്റെ വായില്‍
പട്ടയടിച്ചു
പട്ടട മു‌ടാന്‍
ആരുടെ നവിന്നൊരു
ഉയിരുള്ള വക്കുതിര്‍ക്കും

പിറന്ന മണ്ണില്‍
മണ്ണിന്റെ മക്കള്‍
വെടിയേറ്റു വീഴുമ്പോള്‍
യുവരക്തത്താല്‍
മണ്ണ് ചുവക്കുമ്പോള്‍
എച്ചില്‍ കൂനകളില്‍
കബന്ധങ്ങള്‍ അടിയുമ്പോള്‍
ഒരമ്മയുടെ, ഒരു കുഞ്ഞിന്റെ
തീപാറുന്ന നോട്ടത്തിനു മുന്‍പില്‍
ശരീരം
വാക്കിനായി പരതി

തിരിച്ചറിവിന്റെ വറുതിയില്‍
വാക്ക്
ഉയിരയിരുന്നുവെന്നു
ശരീരം അറിഞ്ഞു
അപ്പോള്‍ വാക്ക്
ശരീരത്തില്‍ നിന്നകന്ന്
എത്തിപ്പിടിക്കാന്‍ കഴിയുന്നതിലും
ദൂരത്ത് എത്തിയിരുന്നു

അമ്മ

ഇരുളും മനുഷ്യനും

ഇരുളെന്നു പറഞ്ഞതിനെ
കറുപ്പെന്നു പറഞ്ഞു
കറുപ്പെന്നു പറഞ്ഞതിനെ
നിറമെന്നു പറഞ്ഞു
നിറമെന്നു പറഞ്ഞതിനെ
സുന്ദരമെന്നു പറഞ്ഞു
സുന്ദരമെന്നു പറഞ്ഞതിനെ
ദൈവമെന്നു പറഞ്ഞു
ദൈവമെന്നു പറഞ്ഞതിനെ
മനുഷ്യനെന്നു പറഞ്ഞു
മനുഷ്യനെന്നു പറഞ്ഞതിനെ
ഇനി നാമെന്തു പറയും ?

അഭിസാരിക

എന്‍റെ സീടിനരികെ
അവള്‍ ഉണ്ടായിരിന്നു
അവള്‍ നിശബ്ദയായിരുന്നു
പക്ഷേ ആയിരം നാവുണ്ടായിരുന്നു
കണ്ണില്‍ തിളക്കമുണ്ടായിരുന്നു
അവസാനം വണ്ടി നിന്നു
ഞാനിറങ്ങി, അവളും
എന്‍റെ പിന്‍പേ നടന്നു
എന്റെയൊപ്പം നടന്നു
എന്‍റെ മുന്നേ നടന്നു
കാര്‍ക്കിച്ചു തുപ്പി
ചീത്ത വിളിച്ചു
പിന്നെയടുത്ത വണ്ടിക്ക്‌
കൈകാട്ടി

ഒരു കോപ്പ കള്ള്

എരിവും പുളിയുമായി
മേശ നിറഞ്ഞു
കോപ്പയില്‍ നിറയുന്നത്
കെട്ടിയവളുടെ കണ്ണീരാണ്
നുരഞ്ഞു പൊന്തുന്നത്

മകന്‍റെ വിശപ്പാണ്

തുളുമ്പി തൂവുന്നത്
പെങ്ങളുടെ മാനമാണ്
ആടികുഴയുന്നത്
ആനവാല്‍ പുരയാണ്
കാലി ആകുന്നത്
പിത്രുത്വമാണ്
എറിഞ്ഞുടക്കപെടുന്നത്
ജീവിതമാണ്‌
ഓടയില്‍ വീഴുന്നത്
അന്നന്നത്തെ അപ്പമാണ്

ലൈഫ്